2024-11-18

EP6. 被子移加搬屋好閉翳 feat. 牙溫

你以為喺多倫多搵到屋就萬事大吉，被子話俾你知，呢個只不過係一個開始； 今集繼續請到牙溫，同我哋一齊傾吓喺加拿大落地生根，真係冇想像中咁容易： 交樓過程一地雞毛，你嘅紗窗差啲跌落街，我嘅無奈叫做「你大我呀」； 遇到業主無理續租要求要點算？呀澤日刨法律，夜讀條文，教你速成LTB最強王者； 呀米「家有一龐然大物，四腳而立，並有六匣」，屢令搬屋師傅叫苦連天，險列黑名單而不自知； 牙溫搬屋無故釀成「book lift 羅生門」，現場激情對話，舌粲蓮花； 加港租屋大不同，凶宅禁忌、入伙儀式，你又識唔識？呀澤表示佢只識「Yahoo知道」。 雖然喺多倫多租屋同搬屋都充滿好多眉眉角角 但係搵到一個屬於自己嘅溫馨小窩 呢種幸福感又真係「零舍唔同」 被子祝願喺異地漂流嘅大家 無論海角定天涯，都能夠 心有所依 身有所居 【節目製作】 文案企劃：呀澤 聲音剪輯：呀米 音樂設計：牙溫 聽眾信箱： https://open.firstory.me/user/clwcujuhs0cow01tbd65rcwut/comments --

2024-09-15

EP5. 被子移加搵屋唔容易 feat. 牙溫

喺多倫多生活咗咁耐，仍然有一種異鄉人嘅感覺。 有時會諗，係咪對呢座城市足夠熟悉就唔會咁覺得，定係要喺呢座城市巨人腳下買車買樓，甚至有埋citizenship，先至可以擺脫呢種漂泊感？ 從來都冇人俾過我哋答案，好似由離開香港嘅果一剎那，就唔知點解變成一個漂流嘅異鄉人； 或者，由始至終，我哋都仲未搵到一個屬於自己嘅家。 今集請到最近搬咗屋嘅牙溫，同咁啱得咁橋都係搵緊屋搬嘅呀米，我哋一齊傾下喺多倫多搵一個「舒適的家」嘅各種「糟心事」： 搵樓如同見工，上至家庭背景，下至財產證明，甚至讀書轉科，地產經紀同你一對一面試； 旺季租樓堪比拍賣會，古有唐玄宗一騎紅塵妃子笑，今有千金散盡只為bid得心水租盤； 再三尖八角嘅租盤都租得出？係「廳中柱睇電視」可怕，定係「窗台掂到highway」更得人驚； 呀澤險租暗盤，租金交收現場驟變歡樂滿東華總理支票遞交儀式，沒有最荒謬，只有更荒謬！ 📢小號外📢 有冇留意到我哋嘅片頭唔同咗呢？被子特別請到今集嘅嘉賓牙溫，親自操刀創作並且演繹咗呢首片頭曲 希望佢嘅歌聲可以同我哋嘅節目一樣，陪伴每一個在外漂泊嘅異鄉人 就算世界紛紛擾擾，我哋都唔好捨棄衝出被子外嘅果份勇氣 終有一日，我哋都會搵到屬於自己嘅一方天地 萬家燈火，總有一盞為你點亮 【節目製作】 文案企劃：呀澤 聲音剪輯：呀米 音樂設計：牙溫 聽眾信箱： https://open.firstory.me/user/clwcujuhs0cow01tbd65rcwut/comments --

2024-08-18

EP4. 被子裡面職業密密傾：空姐篇（下） feat. Kiwi

歡迎大家再次乘搭被子航班，今集繼續請到前空姐Kiwi，同我哋一齊分享吓空中服務員工作以外有趣嘅故事： 明星夫婦錯將飛機托盤當成「換片板」，滿滿味道猶如毒氣入室； 你以為只有乘客先會搭訕空姐，原來同事之間更會出現「鹹豬手」； 你知唔知道杯麵其實唔係用水沖，而係溝左綠茶落去呢？ 空姐唔單止有「一折機票」周圍飛，仲有大把零用錢俾你大洗特洗； 原來空姐喺外地最重要嘅一課，係要學識獨處，好好享受一個人嘅生活。 仲想聽我哋講啲咩行業，不妨留言話俾我哋知吖： https://open.firstory.me/user/clwcujuhs0cow01tbd65rcwut/comments 文案：呀澤 & 呀米 剪輯：呀米 --